സമ്പത്തിനോടുള്ള മനുഷ്യന്റെ നിലപാടിനെ സൂചിപ്പിക്കുന്നതാണ് ഇന്നത്തെ സുവിശേഷം. സമ്പത്തിനോടുള്ള സമീപനം ഈശോയുടെ ഒരു പ്രധാന സംസാര വിഷയമായിരുന്നു. ഈശോ പറഞ്ഞ 37 ഉപമകളിൽ 16 എണ്ണത്തോളം സമ്പത്തുമായി ബന്ധപ്പെട്ടാണ് എന്നണ് ബൈബിൾ പണ്ഡിതന്മാർ പറയുന്നത്.
ഇന്നത്തെ വായനകൾ ഒക്കെ തന്നെ സമ്പത്തിന്റെ നശ്വരതയെ സൂചിപ്പിക്കുന്നതാണ് .
ഒന്നാമത്തെ വായന ഉല്പത്തി പുസ്തകത്തിൽ ദൈവമായ കർത്താവ് ഭൂമുഖത്തുള്ള സകലത്തേയും വെള്ളപ്പൊക്കത്താൽ നശിപ്പിക്കുന്ന ഭാഗമാണ് വായിക്കുക.
രണ്ടാമത്തെ വായനയിൽ ജെറമിയ പ്രവാചകന്റെ പുസ്തകത്തിൽ ദൈവത്തോടുള്ള ഭക്തി ഇസ്രായേജനത്തിന്റെ ഹൃദയത്തിൽ നിക്ഷേപിക്കും എന്നുള്ള കാര്യം പ്രവാചകൻ സൂചിപ്പിക്കുന്നു. എന്നു വച്ചാൽ ഹൃദയത്തിലെ ദൈവഭക്തിയാണ് യഥാർത്ഥ സമ്പത്ത് എന്നർത്ഥം. പിന്നെ
ലേഖനത്തിൽ യാക്കോബ് ശ്ലീഹ ഏതാണ്ട് ഇതേ ആശയം തന്നെ പങ്കുവയ്ക്കുന്നു. അതായത് ലോകത്തോടും ലൗകിക സുഖങ്ങളോടുള്ള മൈത്രി ദൈവത്തോടുള്ള ശത്രുതയാണ് എന്ന്. ഇതിൻറെ തുടർച്ചയായിട്ട് തന്നെയാണ് സുവിശേഷം. അവിടെ ഈശോ ഭൂമിയിൽ നിക്ഷേപം കരുതി വയ്ക്കരുതെന്നും സ്വർഗ്ഗത്തിൽ നിക്ഷേപം സൂക്ഷിക്കണമെന്നും നമ്മുടെ നിക്ഷേപം എവിടെയാണോ അവിടെയാണ് നമ്മുടെ ഹൃദയവും എന്ന്‌ ഓർമ്മിക്കുന്നു.

1. ഏതു ബാങ്കിലാണ് Account?

ആലപ്പുഴ കരുവാറ്റയിൽ കൊച്ചുമകളും കൂട്ടുകാരും ചേർന്ന് അപ്പൂപ്പനെ കൊലപ്പെടുത്തിയ വാർത്ത നമ്മളിൽ ഞെട്ടൽ ഉളവാക്കി. കൊലപാതകത്തിന്റെ ലക്ഷ്യം പ്രധാനമായും അപ്പൂപ്പന്റെ കൈവശമുള്ള പണം/ സ്വർണം അടിച്ചു മാറ്റുക, കൂട്ടുകാർക്ക് ബൈക്കും പെൺകുട്ടിക്ക് ഒരു ഐ ഫോണും... എന്താല്ലേ....??(എന്തൊക്കെയാണ് ഈ കൊച്ചു കേരളത്തിൽ നടക്കുന്നത്‌...??)

ഈ കാര്യത്തിൽ മാത്രമല്ല കേരളത്തിൽ നടക്കുന്ന ഒരുമാതിരി എല്ലാ ക്രൈമുകളുടെയും അടിസ്ഥാന കാരണം പണമാണ്.
അതുമാത്രമല്ല നമ്മുടെ നാട്ടിലും വീട്ടിലും പള്ളിയിലും പാർട്ടിയിലും അയൽക്കാർക്കും ബന്ധുക്കൾക്കും ഇടയിലുമുള്ള തർക്കവിഷയങ്ങളുടെ പ്രധാന കാരണം സമ്പത്താണ്.
പണം, സ്വർണം, പറമ്പ്, വിഹിതം, ഇതെല്ലാം കിട്ടിയതു പോര, കൊടുത്തത് കൂടി , ഉദ്ദേശിച്ച പോലെ കിട്ടിയില്ല..., കൊടുത്ത് പോലെ തിരിച്ചു തന്നില്ല...., എന്നിങ്ങനെയുള്ള പരാതികളും പരിഭവങ്ങളുമാണ് വീട്ടുകാർക്കിടയിലും ബന്ധുക്കൾക്കിടയിലും ഉയർന്നുനിൽക്കുന്ന പരാതികളിൽ പ്രധാനപ്പെട്ടത്.

ഈ കാലത്ത് സമ്പത്തിനോട് ഒരല്പം അകൽച്ച പാലിക്കാൻ സുവിശേഷം നമ്മെ ഓർമിപ്പിക്കുന്നു. ഏതു വിധേനയും പണം സമ്പാദിക്കുക, അതു നല്ല പോലെ സൂക്ഷിക്കുക, ഇരട്ടിപ്പിക്കുക , ആർഭാടമായി ചെലവഴിക്കുക ഇതൊക്കെയാണല്ലോ നമ്മുടെ പ്രധന ലക്ഷ്യം. മണി ചെയിനുകൾ , പണം ഇരട്ടിപ്പിക്കൽ തട്ടിപ്പുകൾ , share market നിക്ഷേപങ്ങൾ, ഓൺലൈൻ തട്ടിപ്പുകൾ , online game കൾ ഇതിലെല്ലാം കൊണ്ടു തലവെയ്ക്കുന്നതും കാശ് പോകുന്നതും ജീവിതം തുലക്കുന്നതിലും മലയാളികൾ മുന്നിൽ തന്നെ... അതിൽ മുന്നിൽ ക്രിസ്ത്യനികളും....

സാമ്പത്തിക ബാധ്യത മൂലം ആത്മഹത്യ ചെയ്യേണ്ടിവരുന്ന സത്യക്രിസ്ത്യനികളുടെ എണ്ണം കൂടി കൂടി വരുന്നു... എത്ര കണ്ടാലും.. കിട്ടിയാലും... നമ്മൾ പാഠം പഠിക്കുന്നില്ല...
ഭൂമിയിൽ നിക്ഷേപം കരുതി വെക്കരുത് എന്നണ് ഈശോ പറയുന്നത്.
ഭൂമിയിലെ നിക്ഷേപങ്ങൾക്ക് അൽപ്പായുസാണെന്ന് ഓരോ പ്രകൃതി ദുരന്തങ്ങളും നമ്മെ പഠിപ്പിക്കുന്നുണ്ട്. അത് മാത്രമല്ല നമ്മുടെ കൂട്ടിവെച്ച് നിക്ഷേപങ്ങൾ ഓരോന്ന് ഓരോന്ന് പൊട്ടിക്കൊണ്ടിരിക്കുകയാണ് .
ചിട്ടികളും, സൊസൈറ്റികളും, സഹകരണ ബാങ്കുക ളും എന്തിനു nationalised bank കൾ വരെ പൊട്ടികൊണ്ടിരിക്കുന്ന കാലമാണിത്... പണം നഷ്ടപ്പെട്ട വരുടെ വിലാപങ്ങൾ കൂടി കൂടി വരുന്നു...
ഈ കാലഘട്ടത്തിൽ സമ്പത്തിന്റെ കാര്യത്തിൽ ജാഗ്രത ആവശ്യമാണ് .

കുട്ടികൾക്ക് സുരക്ഷക്കായി ചെറുപ്പത്തിലെ തന്നെ അവർക്കായി വേണ്ടിയിട്ട് ജീവൻ രക്ഷാ പോളസികളും പോസ്റ്റ് ഓഫീസ് അക്കൗണ്ടു കളും കുറികളും , ചിട്ടികളും സ്വർണ്ണ നിക്ഷേപങ്ങളും പണം ഇരട്ടിക്കൽ പരിപാടികളും നമ്മൾ ചെയ്തു വയ്ക്കാറുണ്ട് നല്ല കാര്യം .
പക്ഷേ ഈശോ പറയുന്നു സ്വർഗത്തിൽ ഒരു account തുടങ്ങാൻ... അതിനു നമ്മുടെ പിള്ളേരെ ഒന്നു പരിശീലിപ്പിക്കുന്നത് നല്ലതാണ്.
സാമ്പത്തിക ബാങ്ക് എന്ന പോലെ പ്രാർത്ഥന കൊണ്ടും കൊച്ചു കൊച്ചു പുണ്യങ്ങൾ കൊണ്ടും ത്യാഗ പ്രവർത്തികൾ കൊണ്ടും നിറയ്ക്കാവുന്ന ഒരു നിക്ഷേപം /ഒരു ബാങ്ക് കുട്ടികൾക്കായി ഉണ്ടാക്കി വയ്ക്കുക. PRAYER BANK എന്നൊക്കെ അതിനെ വിളിക്കാം.

സ്വർഗ്ഗത്തിലെ അങ്ങനെ ഒരു നിക്ഷേപം കരുതിവെച്ച ഒരു വലിയ വിശുദ്ധ യുടെ തിരുനാൾ ഇന്ന് ലീമായിലെ വിശുദ്ധ റോസ . അത്യവശ്യം സമ്പന്ന കുടുംബത്തിൽ ജനിച്ചിട്ടും അതെല്ലാം ഉപേക്ഷിച്ച് സന്യാസ ജീവിതത്തിലേക്ക് ഇറങ്ങിത്തിരിച്ചു, ബോധപൂർവ്വം ദാരിദ്ര്യത്തെ പുൽകി സ്വർഗ്ഗത്തിൽ വലിയ നിക്ഷേപം കരുതി വച്ച വലിയ വിശുദ്ധ. ആ വിശുദ്ധയെപോലെ
ജീവിതത്തിൽ ചെറിയ പ്രാർത്ഥനകൾ ചൊല്ലിയും കുറച്ചു പുണ്യങ്ങൾ ചെയ്തും
കൊച്ചു കൊച്ചു ത്യാഗപ്രവർത്തികൾ ചെയ്തുകൊണ്ട് സ്വർഗ്ഗത്തിലും നിക്ഷേപങ്ങൾ കരുതിവയ്ക്കാൻ നമ്മുടെ മക്കളെ പഠിപ്പിക്കാം ...

SOUTH INDIAN BANK , SBI ,SBT, CSB , മണപ്പുറം / കൊശമറ്റം ഫിനാൻസ് എന്നൊക്കെ പറഞ്ഞു നമ്മൾ നിക്ഷേപിക്കുന്നപോലെ സ്വർഗ്ഗത്തിൽ PRAYER BANK ൽ ഒരു ACCOUNT കുട്ടികൾക്കായി തുടങ്ങുക അതിനു അവരെ പരിശീലിപ്പിക്കുക. അത് അത്യവശ്യമാണ് ഈ കാലത്ത് .. (ഓർക്കണം വെറും 13 വയസുള്ള പെൺകുട്ടിയാണ് പണത്തിനായി ഒരു കൊല ആസൂത്രണം ചെയ്തത്....)

2. കണ്ണ് ശരീരത്തിൻറെ വിളക്ക്

കണ്ണിനെ , കാഴ്ചയെ കുറേകൂടി ഗൗരവത്തിൽ പരിഗണിക്കേണ്ടതു തോന്നുന്നു. പഴയ കാരണവന്മാരുടെ ഭാഷയിൽ ഒരു 'കണ്ണടക്കം' നമുക്ക് എല്ലാവർക്കും നല്ലതാണ്. "എന്തെന്നാല്‍, ജഡത്തിന്റെ ദുരാശ, കണ്ണുകളുടെ ദുരാശ, ജീവിതത്തിന്റെ അഹന്തഇങ്ങനെ ലോകത്തിലുള്ളതൊന്നും പിതാവിന്റേതല്ല; പ്രത്യുത, ലോകത്തിന്റേതാണ്‌." 1 യോഹ 2 : 16 എന്നാണ് ഇമ്മടെ യോഹന്നാൻ ശ്ലീഹ പറയുന്നതും.
ഇംഗ്ലീഷ് ഭാഷയിലെ 'കാഴ്ചയും' ( Sight) 'നോക്കലും' (Look) തമ്മിലുള്ള വ്യത്യാസം അറിയാമല്ലോ. ഒന്ന് നാമം ( Noun) ആണെങ്കിൽ മറ്റൊന്ന് ക്രിയ ( Verb ) ആണ്. അതായത് 'നോക്കുക' ( Look) എന്നൊക്കെ പറയുന്നത് ഒരു 'deliberate action' ആണ്. നമ്മുടെ കാഴ്ചകളെ നിയന്ത്രിക്കാൻ പറ്റിയില്ലെങ്കിലും നമ്മുടെ ചില നോട്ടങ്ങളെ നമ്മുക്ക് ഒന്നു കൺട്രോൾ ചെയ്യാം. ആസക്തിയോടെ സ്ത്രീയെ നോക്കുന്നവൻ ( പുരുഷനെ നോക്കുന്നവളും കെട്ടോ) അവളുമായി/ അവനുമായി വ്യഭിചാരം ചെയ്യുന്നു എന്നാണ് കർത്താവ് പറയുന്നത്. ഈ സ്ത്രീ/ പുരുഷൻ എന്നൊക്കെ പറയുന്നത് . കൂടെ പഠിക്കുന്നവരോ ജോലി ചെയ്യുന്നവരോ യാത്ര ചെയ്യുന്നവരോ മാത്രമല്ല ചില ഒറ്റപ്പെട്ട നേരങ്ങളിലുള്ള നിൻറെ 'ഗൂഗിൾ സർച്ചിനും' ഒരു 'കണ്ണടക്കം' വേണം എന്ന് തന്നെയാണ് അർത്ഥം.

3. രണ്ടു വള്ളത്തിൽ കാലു വയ്ക്കരുത്

പണ്ട് കാരണവന്മാര് പറയാറുണ്ട് രണ്ടു വള്ളത്തിൽ കാലു വെക്കരുത് എന്ന്. ഏതാണ്ട് ഇത് തന്നെയാണ് ഇന്നത്തെ സുവിശേഷത്തിൽ ഈശോ പറയുന്നത് " ദൈവത്തെയും മാമോനെയും ഒരുമിച്ചു സേവിക്കാൻ പറ്റില്ല എന്ന് . "
ഈ പണം തന്നെ ദൈവമായി മാറുന്ന അപകടം നമുക്കിടയിൽ കൂടി വരുന്നുണ്ട്.
പഴയ നിയമത്തിലെ അഹറോന് സംഭവിച്ച ഒരു അപകടം ഉണ്ട്. പുള്ളി ഇസ്രായേൽ ജനത്തിന്റെ അഭ്യർത്ഥന മാനിച്ചു അവരുടെ സ്വർണം ഉരുക്കി അവർക്കായി ഒരു കാളക്കുട്ടിയെ ഉണ്ടാക്കി അതിനെ ആരാധിച്ചു. ആ ഒരു അപകടം, എന്ന് പറഞ്ഞാൽ സമ്പത്ത് കൊണ്ട് ഒരു ദൈവത്തെ തീർക്കുന്ന അല്ലെങ്കിൽ സമ്പത്ത് തന്നെ ദൈവമായി പരിഗണിക്കപ്പെടുന്ന അപകടം നമുക്കും സംഭവിക്കാം. അതുകൊണ്ട് ജാഗ്രതൈ....!!!
പൗലോസ്‌ ശ്ലീഹയുടെ വാക്കുകൾ ഓർക്കുക: "വിഗ്രഹാരാധന തന്നെയായ ദ്രവ്യാസക്‌തിയെ നശിപ്പിക്കുവിന്‍"
(കൊളോ 3 : 5). രണ്ടു വഞ്ചിയിൽ കാലിട്ടു ഏറെ ദൂരം മുന്നോട്ടു പോകാൻ പറ്റില്ല എന്ന് ചുരുക്കം.

"ഈശോയിലാണ് എന്റെ വിശ്വാസം... കീശയിലാണ് എൻറെ ആശ്വാസം" എന്ന് പണ്ട് കുഞ്ഞുണ്ണി മാഷ് പറഞ്ഞപോലെയാണ് നമ്മുടെ കാര്യങ്ങൾ. ദൈവവിശ്വാസവും ദൈവാശ്രയ ബോധവും ഉണ്ടെന്നു പറഞ്ഞാൽ പോലും സമ്പത്തിന്റെ കാര്യത്തിൽ നോ കോംപ്രമൈസ്... ഇതാണ് ക്രിസ്ത്യാനികളുടെ ഒരു ലൈൻ
പണ്ട് കുട്ടിയായിരുന്നപ്പോൾ നമ്മോടു ചോദിച്ച ചോദ്യം ഒന്നു കൂടി ചോദിച്ചാൽ എന്തു മറുപടി പറയും...? "സാത്തനെയും അവന്റെ സകല ആഡംബരങ്ങളും നീ ഉപേക്ഷിക്കുന്നുവോ....?"

ഓർക്കുക... ആഡംബരങ്ങൾ ഒരു പരിധി കഴിഞ്ഞാൽ പിന്നെ സാത്താന്റെ ആണ്.....

ചോദ്യവും ഉത്തരവും

ദൈവത്തെയും മാമോനെയും സേവിക്കാന്‍ നിങ്ങള്‍ക്കു സാധിക്കുകയില്ല.
മത്തായി 6 : 24.
Who is this Mammons..?
( Momos അല്ല കെട്ടോ...)

ഇതൊരു അറമായ പദമാണ് ( MAMONAS ). അതിനു നൽകുന്ന അർത്ഥങ്ങളിൽ ഒന്നു 'വ്യക്തി വത്ക്കരിക്കപ്പെട്ട സമ്പത്ത്' ( Wealth Personified) എന്നാണ്‌. എന്നാൽ മധ്യ നൂറ്റാണ്ടിൽ മാമ്മോൻ എന്നത് സമ്പത്തിന്റെ പിശാച് (Demon of the wealth) ആയും കണക്കാക്കിയിരുന്നു